(( الفصل الثاني عشر – الجزء 2 ))

اندو انا احبك (( الفصل الثاني عشر – الجزء 2 ))

يطلع الدكتور عليهم ..
يروح ابو اندو له : وين اندو ؟؟ وش فيه ؟؟
الدكتور ساكت .... تقوم ام اندو وتمسك الدكتور ..
الام : ابي اشوف ولدي .... ابي اشوف اندو ...
ماري من ملامح وجه الدكتور صارت تصيح ....
الدكتور : سيد ديجير اتمنى تجي معي ...
الاب تبعه وهو مهموم ..
راحت ام اندو الى ماري وضمتها وصارو يبكون هالثنين على حال اندو المجهول ..
في مكان آخر وبالتحديد سكن الطلاب :.
آيا جالسه في الحديقة تشرب عصير : اخيرا فهمت .... انا ليه حبيت اندو .....
يوكي : كيف؟؟ ...
آيا : لا ماراح اقولك كيف الا لما اقول هالشيء لاندو نفسه..
في المستشفى .....
طلع ابو اندو من عند الدكتور ..
ابو اندو : في غيبوبه ... يقول الدكتور ان الضربه كانت في الراس وزين انه سلم منها .....
ماري جالسه على الارض تسمع الكلام وماتتكلم من الصدمة ..
الام وقفت و الدموع تسيل على خدها : يعني ما راح يصحى ؟؟
ابو اندو : لا انا ماقلت انه ماراح يصحى انا اقول الدكتور قال انه بيدرس حالته اثناء الغيبوبه ... يقول ما فيه أي جروح او اصابات في راسه ..... معناه انه بيرجع طبيعي .. لكن يقول ان فيه شيء 
يبي يتأكد منه ... وما علمني وش هو ...
ابو اكيرا : طيب متى راح يصحى ؟؟
الاب : ما ادري ما قال لي الدكتور وقت محدد ....
الام حطت يدينها على وجهها وصارت تصيح ..مسكها ابو اندو وصار يواسيها : تقدرين تشوفينه خلف العازل الزجاجي ...
الام تصيح بألم : انا ما ابي اشوفه خلف العازل انا ما ابيه على السرير الابيض ..ابي امسكه بين يديني واضمه لصدري وحيدي غلاي اللي مالي غيره في هالدنيا اعز ما املك ..ابي ولديييييييييييييييي 
 ..
ابو اكيرا: يا ابو اندو خذ ام اندو للبيت خلها ترتاح ..
الاب : خلاص يا حبيبتي خلينا نرجع للبيت مو لازم توشوفينه الحين ..لما ترتاحين نرجع نزوره يالله يا ام اندو ..
توقف الام وهي حزينه رجعت مع زوجها لبيتهم..
 ابو اكيرا : ماري حبيبتي خلينا نرجع احنا عشان تغيرين اللي عليك وترتاحين ماله داعي قعدتنا في المستشفى ..
ماري وقفت: باب روح انت قبلي ... انا بأرجع بسيارة اندو ... اسبقني .....
الابو : بس يا مار....
ماري تروح وتتركه ....
وتروح وتوقف قدام العازل الزجاجي تناظره وهو على السرير الابيض  ...
ماري تنزل دموعها لمنظره  ...
ماري : عمري ما تصورت اني بشوفك بيوم كذا يالغالي .. بس الحمد لله انك عايش...و اسفه كانت غلطتي .. سامحني ...
تجي ممرضة لها ..
الممرضة : لو سمحتي  ؟؟
ماري تمسح دموعها و تلتفت عليها : نعم ...
الممرضة : انتي من اقارب المريض صح؟؟...
ماري تهز راسها : ايه انا بنت عمه ..
الممرضه: انتي الي نقلتي المريض الى هنا..
ماري : ايه انا..
الممرضه : الدكتور يبي يتكلم معك ممكن تتفضلين معي..
ماري: طيب ..
وتروح معها الى غرفة الدكتور ..
تدخل ماري على الدكتور ..
الدكتور : تفضلي اجلسي ......
ماري تجلس
الدكتور : انت اللي جبتي المصاب لهنا ...
ماري : أيــه ..
الدكتور : فيه شيء استغربته ... انتي قلتي اول ما جبتيه حادث سياره .. لكن جسمه معافى بالكامل .... ابيك تعلميني كيف صار الحادث ...
ماري : في الحقيقة هو مو حادث هو سقط مغمى عليه ..
وقالت للدكتور كل شيء حصل من وصلّها للمكان الى ان جابته للمستشفى..
الدكتور : شكرا على المعلومات ... تقدرين تروحين وترتاحين ....
ماري : العفو...
وتوجهت للباب طالعه عند الباب التفتت على الدكتور ...
ماري : دكتور ... ممكن اسأل سؤال ؟؟
الدكتور : تفضلي ...
ماري : انت وش اللي ما خبرته لعمي ؟؟
الدكتور : ما راح اقول شيء انا نفسي ما ادري اذا هالشيء فيه او لا ...
ماري : لو لا قدر الله حصل اللي تفكر فيه لاندو ... هل بيرجع طبيعي وما راح يأثر فيه ؟؟
الدكتور متفاجيء : لا تسبقين الاحداث .... وانا دكتور ومهمتي اني اداوي .... لا تخافين .....
ماري : اتمنى ان ما يكون فيه شيء .........
وتفتح الباب وتطلع ..
تروح تركب السياره ... ترفع يدينها وتشوف فيها دم ...
ماري : منظر مرعب ....
وتحط راسها على الدركسون .....
ومن بعد يومين .... الساعة 2 الظهر في سكن آيا ...
يوكي : آيـــا ~ ...... جوالك يرن ..
آيا في الحمام : انا اتروش شوفي مين ؟؟
يوكي تمسك الجوال وتشوف ان المتصل ماري ....
يوكي : ماري ...
آيا : ماري ؟! ..... تكفين يوكي ردي عليها ...
يوكي : لكن هي تبيك انتي ..
آيا : هي ما تحب اني ما ارد عليها ... على الاقل شوفي وش تبي .....
يوكي : اوكي ...
وتمسك الجوال وترد ..
ماري : السلام ..
يوكي : وعليكم السلام .....
ماري : انتيـ...
يوكي : انا يوكي ...
ماري : ممكن آيا .....
يوكي : آيا تاخذ شور.. تبين ابلغها شيء ..
ماري : اها ..خلا..
تطلع آيا بروبها من الحمام
يوكي : لحظه ماري هذي هي طلعت خذيها ....
وتمسك آيا الجوال ..
آيا : هلا ماري ..
ماري صوتها بدأ يتعبر : آيا ..
آيا مستغربه : فيه شيء ... اول مره تدقين علي الظهر ..
ماري : انا الحين قريبة من سكنك ..
آيا : هااه ..
ماري : فيه شيء ابي اقولكياه ...
آيا : طيب حياك ...
ماري : كم رقم شقتك ؟؟
آيا : C33
ماري : طيب .. انا جاية..
آيا : انا بانتظارك  ..
تسكر آيا الجوال ولازالت متفاجئه ...
يوكي : وش عندها ؟؟
آيا : الحين بتجي ..
يوكي : هاه ..
آيا : بروح البس ..
يوكي : اوكي بأجهز الشاهي ..
توصل ماري وتوقف قدام مبنى السكن حق آيا ..
ماري في نفسها : لازم امهد لها ..... انا ما اقدر اني اخبي اكثر عنها ..
تنزل وتتوجه لقسم ( c) لشقة ( 33) ولما وقفت قدام الشقة رنت الجرس ..
فتحت يوكي الباب  ..
يوكي : هلا ماري تفضلي ..
ماري : هلا بك..
يوكي : تفضلي..
تدخل ماري وتقعد في الصالة .. طلعت آيا من غرفتها وسلمت عليها ..
آيا : هاه وش الموضوع ؟؟
ماري متوتره : انـا ...
يوكي  تدخل عليهم: جهز الشاهي ..
وتحط الشاهي على الطاوله قدامهم ...
يوكي : آيا انا بأروح للغرفة ... ماري خذي راحتك ....
تبتسم ماري في وجهها .. وتروح يوكي..
آيا : تحبين احلي لك الشاهي اكثر ..
ماري : أي شيء ..
آيا : ايوه وش الموضوع ؟
ماري : آيا انا قبل يومين طلعت مع اندو ...
آيا وقفت عن  تحريك السكر في الشاي .. 
آيا ببسمة : وكيف الحال ؟؟
ماري : انا ما طلعت معه كموعد .. انا قلت له اني طفشانه وطلعنا ..
آيا : هذا اللي بتخبريني به ..؟؟
ماري : لا ..
آيا : فيه شيء ثاني ؟؟ حصل شيء ؟
ماري نزلت عيونها للارض ..
ماري : يوم كنت اتمشى وياه .. حس اندو بدوخة ...
آيا بجدية : ايش .. حس بدوخه ؟! ..
ماري : ايه واغمى عليه ..
آيا في نفسها وبخوف : نفس ما حصل ذاك اليوم ..
آيا تحاول تكون طبيعية : اكيد بسبب انه ارهاق نفسي .. او بسبب ضغط العمل ..
ماري : كيف ؟؟
آيا : اندو مره حصل له هالشيء من قبل واغمى عليه ...
ماري : اندو اغمى عليه معك ؟؟
آيا : شفته مره بالصدفة وكان تعبان .. وبعد ما وديته المستشفى صار ارهاق نفسي .. لكن اعتقد هالمره انه عمل لانك قلتي لي انه يعمل طول الوقت
ماري : آآه ... كذا .
آيا : بس تراه يصحى من ثاني يوم يعني عادي ..
ماري : لا ...
آيا : هاه ..
ماري : اندو ما صحى ..
آيا تفتح عيونها : وش قصدك ؟؟
ماري بارتباك : اندو .. في ..
آيا بقلق : وش فيه اندو .. تكلمي تكفين ؟؟
ماري : اندو الحين في غيبوبه ...
آيا تشهق وتحط يدها غلى فمها من الصدمة : غيبوبه ؟؟؟!!
ماري بألم : لانه اصطدم بسياره عند اغماءه .. وقال الدكتور انه بيصحى بعد ست ايام .. يعني اربع ايام من اليوم ..
آيا : وليش توني ادري ..
ماري : والله حالتي حالة من عرفت عنه وما قدرت اعلمك ..
آيا : هو في اي مستشفى ..
ماري : في Asahi Hospital Tokyo.
آيا بقلق : اعراضه ؟؟ كيفها ؟؟
ماري : قال الدكتور ان جسمه ما تضرر .. لكنـ...
آيا : لكن ايش ؟؟
ماري : فيه شيء مارضى الدكتور يقوله لي ..
آيا : وشو ؟!
ماري : مدري بس انتي اكيد بتعرفين وش في اندو ... عشان كذا آيـا ...
آيا توقف : ماري انا بروح لاندو ..
ماري : آيــــا ..
آيا : انا بروح اشوف اندو ..ثواني بس ..
وتروح آيا لغرفتها وتاخذ شنطتها وجوالها وبطاقتها الجامعية بسرعه..
يوكي كانت جالسه على السرير تقرا كتاب : آيا وش فيك ؟؟
آيا : يوكي مافيه وقت اقولك الحين .. انا بروح ويمكن اتأخر لا تنتظريني ..
يوكي تهز راسها وهي مو فاهمة شيء : طيب ...
طلعت آيا لماري : يالله ماري انا طالعه بسيارتي الحقيني ...
وركبو الثنتين سياراتهم..
آيا تضرب على الدركسون : ليتني عرفت مبكر ....
وبعد ساعتين ونص .. يوصلون للمستشفى ... آيا تنزل وهي تركض ..
ماري شافت آيا وهي تركض ....
ماري باستغراب : وش هالاحساس اللي جاني ؟
آيا تكلم الاستقبال : وين جناح التنويم ؟؟
الاستقبال : في الدور الثالث ..
آيا : شكرا ...
وتركض للمصعد ... تركبه وتتوجه للدور الثالث وتسأل عن اندو ويعلمونها عن غرفته ... تروح لغرفته وتشوفه ...
كانت واقفة خلف العازل الزجاجي شافت اندو قدام عينها على السرير الابيض ... بدت تتعبر وتنزل منها دموع ...
آيا : ما تخيلت بيوم اني باشوفك في هالمكان ؟
تروح آيا وتستأذن بالدخول رفضو وحاولت وطلعت بطاقتها وبعدها سمحو لها بالدخول ..
ماري جالسة تراقب آيا وتحركاتها بصمت ....
تدخل آيا على اندو وتقرب ... تمسك يده وتبدا دموعها تنزل بغزاره .. تناظرها ماري خلف العازل ...
ماري تحط يدها على قلبها : ما ادري .. او ما توقعت .. او اني اعتقدت شيء ثاني .... لكن حسيت اني اشوف عاشقة تبكي على محبوبها ...
آيا تتكلم مع اندو :.
آيا : ما اقدر اتحمل اكثر اني ما انطقها ... لكنـ... لكنـ.. اندو .... انا ما اقدر اخبي مشاعري عليك ... مشاعري لك توصفها كلمة اندو انا احبك ....
تمسك يده وتحطها على جبهتها ... تدخل ماري بهدوء في الغرفة ...
آيا وهي مغمضة عيونها وعلى نفس الوضعية : اندو .... آسفـة .. اني ما كنت قريبة منك في هالوضع .. انت كنت دائما معي .. حبيتك على طيبتك... تمنيت انك دائما تكون معي ...
ماري فتحت عيونها .. وطلعت من الغرفة بدون ما تلاحظها آيا ....
ماري في نفسها : مستحيل .... مستحيل ..
وتروح وتجلس على الكراسي اللي برا ... وبدت تتذكر : اقتباس من (( الفصل الثاني عشر – الجزء 1 ))
[ اندو : البنت اللي احبها ... صح اني الى الان احبها ... لكن .. خلاص .. انا من نفسي بديت هالحب وانا اللي انهيه ...
ماري : ليه تبعد عن طريقها ؟؟
اندو : لاني مو انا الشخص اللي تحبه ... هي تحب شخص ثاني وهذا الشخص الثاني يحبها ... انا لازم ابعد عن طريق سعادتهم .. هذا كل الموضوع .. ]
.............
[ اندو : قلت لك ... انا انهيت حبي ... انا من قبل كنت اتكلم معها كثيييير ... لكن هي نفسها ما حست بحبي .. معناها اصلا ما تتقبلني ...... هي طول هالفتره تعتبرني صديق .. ]
..................
[ اندو : ههههههه .... انتي تشبهين آيا كثيـــر ..... ]
............
ماري مصدومة : البنت اللي كان يحبها هي آيا ؟!
وتتذكر منظر آيا قبل دقايق وكيف كانت حالتها وكلامها .....
ماري مو مستوعبه : وآيــــا ؟؟ آيا كيف حبت اندو .... هي ما كانت تحب اكيرا وبس ؟؟ لا لا ... انا ما استوعب ... لازم اتأكد من هالشيء ....
تطلع آيا من الغرفة وتشوف ماري سرحانه بافكارها ...
آيا : ماري ....
ماري تنتبه لها : نعم ؟
آيا : انا باتأكد من كلام الدكتور .... لازم اعرف وش خايف منه ......
تمشي آيا شوي .... تقوم ماري من مكانها .....
ماري : آيا ~ ....
تلتفت عليها آيا ...
ماري : انا احب اندو ..
آيا تهز راسها : عارفة ..
ماري : اذا خبرك الدكتور اي شيء ... ابي اكون اول شخص يعرف من بعدك ..
آيا تبتسم : هذا اكيــــد .....
وتروح آيا بهدوء وتدخل على الدكتور ..
الدكتور : تفضلي ...
آيا : شكرا ...
وتجلس ...
آيا : انا من اقارب المريض ديجير اندو ... اسمي آيا
الدكتور : اهلا آيا .. اي خدمة أي استفسار ؟؟
آيا تطلع بطاقتها الجامعية ..
آيا : انا ادرس الطب ...
الدكتور : رائع ...
آيا : هل لي الاحقية اني اعرف حالة اندو بالتفصيل .....
الدكتور : اكيد ..
ويطلع ملف اندو ... ويمده لها ..
تفتح آيا الملف وتقرا ....
آيا : هذا كله كنت اعرفه .... لكن بأسألك ... ما فيه أي تطور في حالته ؟؟
الدكتور : ما ادري الشيء اللي ودي اتأكد منه ما يتضح الا بعد ما يقوم ...
آيا : يعنيـ....
الدكتور : يعني لازم ننتظر لين يصحى ....
في غرفة اندو .. تدخل ماري وتجلس عنده ....
ماري : بعد ما تصحى تكفى علمني من هي ؟؟ وامنيتي انها ما تكون آيــــا ...
تطلع آيا من غرفة الدكتور ..... تمر من عند العازل الزجاجي وتشوف ماري قاعده عند اندو .. ثم تناظر اندو ..تنتبه ماري لآيا وتقوم بسرعة ..
ماري : آيــــا ~
ترفع آيا راسها وتشوف ماري ...
ماري : آيــا ...
آيا : خلينا نروح ونجلس تحت .....
ويروحون يجلسون في ردهة المستشفى  ...
ماري : آيـــا ... انتي عرفتي وش في اندو .. صح ؟؟
آيا : ما عندي شيء اقوله ...
ماري : شلون ؟
آيا : الدكتور ما قال لي شيء جديد .. قال انه بيشوف حالته بعد ما يصحى ...
ماري : يعني ما فيه اية تطورات ؟؟
آيا : راح ننتظر ...
بدت ملامح حزن على وجه ماري وتشوف آيا حالتها ...
آيا : اندو راح يكون بخير .... اندو شخص ما يحب ان احد يقلق عليه كذا .... لانه ما يبينا نحزن ..... عشان كذا راح يكون بخير ..... زي ما عودنا
ماري بنفس الملامح : اكيد لانه آندو الرائع ....
وبعد مرور الوقت ترجع آيا للسكن وتروح ماري لغرفة اندو ... توقف عند العازل الزجاجي ...
ماري وهي تناظر اندو : اندو وش فيك بالضبط ؟؟ اصحى يكفي نوم وحشتنا واشتقنا لك ..
ونزلت دموعها ..
في مكان آخر:
دخلت آيا لشقتهم وهي ما فيها حيل تعبانه ....
يوكي كانت في الصاله تتفرج على التلفزيون وسمعت صوت الباب: آيا ؟؟ وش فيك ليش حالتك كذا ؟؟ انتي تعبانه..
آيا ترمي شنطتها على الكنبه وتروح للثلاجة وتفتحها بدون اي كلمة...
يوكي : آيا .. حصل شيء ؟؟ وجهك ما عجبني ...
تطلع آيا الموية من الثلاجة وتصب لها في كاس ..... وتشرب
يوكي : آيــا ~ ...
آيا : اندو ...
يوكي : وش فيه ؟؟
آيا : في غيبوبة .......
يوكي اصدمت : ايش ؟؟ وش صار ؟؟ ليــه ؟؟
آيا : هذا اللي حصل ..
تدخل آيا الموية جوا الثلاجة وتروح تنسدح على الكنبة في الصالة ...
تروح لها يوكي وتجلس قدامها ...
يوكي : قولي وش السالفه علميني ....
آيا وهي متمدده وحاطه يدها على راسها : ما اعرف .. لكن ما ادري احسني ما تطمنت ...
يوكي : وش تتطمنين عليه ؟
آيا : الدكتور قال ان حالة اندو بتتضح بعد ما يقوم من غيبوبته ... لكن ما ادري وش الاحساس اللي فيني ...
يوكي : آيا انتي تعبانه الحين قومي روحي لسريرك ونامي وبعدين لما تصحين اسمع منك كل القصه ...
آيا توقف: معاك حق انا ما فيني حيل يالله بروح انام  ...
يوكي تناظرها وهي تتدخل الغرفة : الله يرحم حالك يا آيا ..
وبعد مرور اربع ايام ...
ماري تطلع من الدوام ويدق جوالها ... تمسك الجوال وترد ..
ماري : الو ...
المتصل : الو السلام عليكم...
 ماري: وعليكم السلام..
المتصل : انتي ماري  ؟؟
ماري : نعم انا ماري ...
المتصل : انا دكتور اندو ...
ماري : آه الحين عرفتك ........
الدكتور : حبيت ابلغك ان المريض اندو صحى من غيبوبته ...
ماري متفاجئة : والله ؟!
الدكتور : كنت احاول اتصل على اولياء امره لكن جوال ابوه مشغول والام ما عندي رقمها .. عشان كذا اتصلت عليك ...
ماري : اقدر اجي ؟؟
الدكتور : اكيد تقدرين .. اتمنى تبلغين اهله عشان بعض الاجراءات..
ماري بفرحه : طيب ..
تسكر ماري ومباشرة تدق على عمها وما رد عليها  : بعدين اقولهم اهم شيء اني استعجل واروح اشوفه.....
في السكن :.
آيا جالسة تذاكر كتاب ترفع يدها وتشوف الساعة ..  ثم تحط يدها على خدها ..
آيا : اليوم .. فيـه شيء ... لكن وشو ؟؟ شلون نسيت ؟؟
في المستشفى :.
تدخل ماري وتكلم الرسبشن حق الدور الثالث ...
ماري : ممكن اعرف وين اندو ديجير ..
الاستقبال : اها هذا المريض نقلوه للدور الاول غرفه رقم 102 ...
ماري : شكرا..
وتنزل للدور الاول وتروح لغرفة 102 ولا تلاقيه وترتاع .. سمعت صوت موية في الحمام وارتاحت عرفته انه يتحمم ..
طلعت متوجهه للدكتور فيما يطلع اندو من الحمام : طقت الباب ..
الدكتور: تفضل..
دخلت ماري ...
الدكتور: اهلا ماري .. ان شاء الله شفتي اندو..
ماري : لا ما بعد شفته لانه كان يتحمم..
الدكنور: آها..
ماري : دكتور كيفها حالته ؟؟
الدكتور : ما بعد بين شيء ....
ماري : شكرا دكتور على كل شيء ..... يعني ارتاح ؟
الدكتور : تقريباً ...
وتروح وهي تركض متوجهه لغرفة اندو.. اندو قدام المراية يناظر نفسه ...
اندو : قالو لي حادث .. لكنـ.. ما اشوف علي أي ضرر ... شيء غريب مع ان الحادث امس الا اني ما اتذكر كل شيء بوضوح .. وراسي ما فيه الا جرح بسيط .... غريبه ..
ويطلع من الحمام وفي نفس الوقت تدخل ماري على غرفته ..
ماري : اندو ..
اندو ببرود : نعم ...
ماري : انت بخير ..
اندو بضحكه جانبية : الحمد الله يعني ماتشوفين ..
ماري استنكرت اسلوبه : هه الحمد لله انك بخير .. كنت قلقانه عليك ....
اندو وهو يتوجه لسريره : تقلقين علي ؟! ليه من انتي ؟
ماري تفتح عيونها : اندو انت ما تذكر من انـــــا ؟؟
في السكن :.
يوكي : والله اليوم الدكتور ما فهمت وش كان يتكلم عنه ..
آيا : بسبب النوم .... قلت لك امس نومي مبكره ما راح يفيدك الفلم اللي كنتي تشوفينه ...
يوكي : أيـــه ... أيـــــه .... المهم انتي فاهمة وبتعلميني .....
آيا : يا عيني عليـــك ...
يرن جوال آيا ...
يوكي : جوالك يرن ..
آيا تروح وتاخذ الجوال ...
آيا : الو ..
ماري : انــــدو ...
آيا : ماري ؟!
ماري وهي تصيح : آيـــــا .... اندو ما عرفني ......   
آيا متفاجئه : لحظه لحظه هدي نفسك انا مافهمت وش تقولين ؟!
ماري وهي تحاول تمسك عبراتها : اندو فقد ذاكرته يا آيا  ....
آيا خافت : فقد ذاكرته ؟؟
وتنتبه يوكي لكلامها ....
ماري : قال لي من انتي ....
آيا : ماري ... انا الحين جايه .....
وتسكر آيا السماعة وتاخذ شنطتها وتركض ....
آيا : يوكي انا رايحة لطوكيو ....
يوكي : آ.آيـ ـ ـ ـا ~ ....
تركب آيا السياره وتحرك .. متوجهه للمستشفى ...
توصل بعد ساعتين و تنزل ركض .... تشوف ماري موقفه عند باب غرفة اندو وشكلها حزين .....
آيا : ماري ؟
ماري : ليـــه تأخرتي كذا ..
آيا : انتي عارفه اني برا المدينه .... وين اندو ؟؟
ماري : جوا ..
تدخل آيا عليه وتشوفه يتصحف جريده .....
آيا : اندو ...
يلتفت عليها ...
اندو :........
آيا بشوق : كيف حالك ؟؟
اندو : تمام ..
آيا : ما تحس بأي الم ؟
اندو : لا انا طيب ...
آيا : الحمد على سلامتك ....
اندو : الله يسلمك ....
تدخل ماري وتناظرهم بتعجب ...
آيا في نفسها : نظراته لي واضح انه ما عرفني ...
آيا : تبي تطلع ؟؟
اندو : أيــه .. ريحة المستشفى تقرف ...
آيا : طيب بروح اشوف اذا كان الدكتور يسمح لك بالخروج ....
وتطلع آيا تلحقها ماري ....
ماري : آيا ... شلون عرفك ولا عرفني ؟؟
آيا بقهر : ومن قال انه عرفني ؟؟ .. اندو ما عرفني ... ما عرفني
ماري : آيــا
آيا : بروح اشوف حالته .... بأسأل الدكتور ..
تطق آيا الباب ...
الدكتور : تفضل ....
تدخل آيا عليه ...
الدكتور : هلا آنسة آيا  تفضلي اجلسي ..
تروح آيا وتجلس ...
الدكتور : بتسألين عن حالة ديجير اندو .... صح ؟؟
آيا : أيــه ...
الدكتور : اجل اسمعي .....
بعد ربع ساعة ...تطلع آيا والدكتور معها ...
الدكتور : الحين اوضح لك كيف ..
آيا : يا ليت ....
ماري : آيـــا ؟ ... وش صار ؟؟
آيا : تعالي معنا ...
يدخل الدكتور على اندو ... وتبقى آيا ومعها ماري برا بس يسمعون ...
الدكتور : كيف حالك ؟؟
اندو : انا تمام ....
الدكتور : ممكن اسألك بعض الاسئلة ... ويا ليت تجاوب بدون ما تسأل ..
اندو يتكتف : تفضل ...
الدكتور قرب من عنده كرسي وجلس : وش اسمك ؟؟
اندو : ديجير اندو ...
الدكتور : وش عاصمة امريكا ؟؟
اندو : واشنطن ....
الدكتور : كم عدد فصول السنة ؟
اندو : اربع ....
الدكتور : عندك اعمام ؟؟
اندو : أيــه عندي عم واحد ...
الدكتور : عنده ابناء ؟؟
اندو : أيــــه ...
الدكتور : وش اسمأئهم ؟؟
اندو : نيزو و أكيـــرا ....
الدكتور : بس ؟
اندو سكت شوي ...
ماري في نفسها : ليــه ما قال اسمي ؟؟
اندو : أيــه بس ....
ماري تفتح عيونها .....
الدكتور : عندك اصدقاء ؟؟
اندو : اغلبهم زملاء ...
الدكتور : انت متخرج ؟
اندو : أيــــه ..
الدكتور : وش قسمك ؟؟
اندو : ادارة اعمال ....
الدكتور : اوكي الحين انتهيت من الاسئلة .. شكرا لتعاونك ..
اندو : ليـــه تسألني ؟
الدكتور : لو قلت لك عند عمك بنت بتصدقني ؟
اندو : من وين له .... هو كبير ومستحيل الحين يجيب عيال ...
الدكتور : طيب انا بروح الحين ... ارتاح ...
اندو : شكرا ....
يطلع الدكتور ويوقف قدام آيا...
الدكتور : هاه كيف شفتيه ؟؟
آيا : مثل ما قلت ..
الدكتور : انا عندي الحين عمل ... اشوفكم بعدين ..
آيا : شكرا لك ..
ماري : آيـا .... انا مو فاهمة ... وش القصة ؟؟
آيا : خلينا نطلع ونجلس في مكان عشان نتكلم ... وشيء ثاني اتصلي على العم ديجير خليه يتطمن على ولده ....
ماري : تو اتصلت عليهم ...
آيا : اجل خلينا نمشي قبل لا يشوفوني ...
تطلع آيا وماري يروحون للنهر ويجلسون ..
آيا : اندو ... فاقد جزء من ذاكرته ...
ماري : جزء ؟؟
آيا : قال لي الطبيب .... من اثر شيء محدد اندو نسى الاشخاص اللي قابلهم في الست او السبع السنوات الماضية ....
ماري : كيف ما فهمت ممكن تشرحين لي ؟!
آيا : قال انه نسى شيء ويتذكر شيء ... مثلا هو ما نسى انه متخرج من قسم ادارة اعمال ... مع ان هذا الشيء مو من زمان حاصل .. يعني من ضمن هذي السنوات ... والشيء الثاني .... انه نساك ونساني .... هو ما قابلنا الا في هالست سنوات الماضية ... ولاحظي انه يعرف كل اهله واسمه..وهذا يدل انه يذكر كل اللي كان قبل ... وهذا هو فقدان الذاكرة الجزئي ...
ماري : ومتى راح ترجع له ذاكرته ؟؟
آيا : هو لازم يذكرنا .... لكن هذا الشيء بجهدنا ... لازم نحاول نخليه يتعرف علينا ...
آيا بدت تمتلي عيونها دموع ...
آيا : انا ما اتحمل انه ناسيني ..... معقوله اقضي كل هالسنوات معه وفي النهاية في يوم وليله .... ما يقدر يتعرف عليـ... ما اقدر اتحمل ...
ماري تناظر آيا بتعجب ..
ماري : آيـــــــا ...
آيا : نعم ...
ماري : اندو ... وش يعني لــــك .....
آيا في نفسها : انا ما استعديت لهالسؤال ... وش لازم يكون جوابي لها ...
ماري : صديـــق ؟؟ زميـــل ؟؟ قريــــب ؟ ولا شخص تعرفتي عليـــــه عشان اكيرا ؟؟
آيا : يعني لي ... صديق .... زميل .... قريب ... وشخص عرفني عليه اكيرا .... و شخص عزيــــز .... شخص غالي علي ....
سكتت ماري ...
آيــــا : انا بروح ...
ماري : تونا ...
آيا : جلوسي هنا ماله داعي ... راح ارجع للسكــــن ....
تقوم آيـــــا وتمشي وعيونها مليانه دموع ... تناظرها ماري وهي حزينه ...
توقف آيـــا وتتكلم معطيه ماري ظهرها ...
آيــا : ماري .... تذكري .. اندو ... ما نسى الا انا وياك ... مع اننا اكثر ناس اقرب له ..... اندو ... مستحيل يقعد ما يتذكرك .. اما انا فهو افضل انه ما يتذكرني .... لان هذا راحه لي ولـــــه .... ماري ... حاولي ان اندو يعرفك ....
وتروح ...
ماري : معقوله ؟ ... آيـــــا تقول هالشيء ... بعد ما عاشت هالمده الطويله معه ......
تركب آيا سيارتها وتمشي .... وهي في الطريق تبكي ...
آيا : كوني قويه آيــا ..... كذا افضل ..... كذا .. افضـ ـ ـ ـل ......
وتمسك جوالها وتدق ..
ماري في نفس المكان جالسة ..
ماري في نفسها : آيــــــــــــــا .... شعوري لفقدان اندو لذاكرته ... اسعدني واحزني في نفس الوقت ... لاني كرهت اني اسمع من اندو انك انتي الشخص اللي يحبـــــــــه .....
آيا تروح وتجلس في كافي ..
دخلت يونا للكافي وشافت آيا قدامها وواضح انها مهمومة ...
يونا : هلا ايا كيفك؟!
آيا بحزن: .......
يونا : وش عندك يا آيا طالبتني ؟؟
آيا : تفضلي يونا ..
يونا : آيـــا وش فيك وجهك ما عجبني ....
آيا عيونها امتلت دموع : يونا ... انا محتاجه لك ....
يونا خافت عليها : آيـــا وش فيك قولي لي ؟؟
آيا تمسح دموعها : راح اعلمك كل اللي حصل من البداية .. لاني اثق انك دائما بتساعديني ...
يونا : آيـــا ...
آيا : الحقيقة اللي وصلت لكم كانت غلط ....
يونا : هاه ؟؟
آيا : من وقت طويـــل مره .... من بداية عام ثالث ثانوي .... من التقيت باكيرا ... انتي فيه اشياء كثيره ما علمتك بها ...
تفاجات يونا من نبرة كلام آيا
آيا تكمل حديثها : يونا .. تذكرين يوم تجيني حراره واتنوم في المستشفى .؟
يونا : أيــه ...
آيا : من ذاك الوقت انا حكيت مع اكيرا بكل شيء ... وحتى هو قال كل شيء لي ...وقالي انه لازم يتزوج بنت من نفس طبقته ... اكيد تعرفين ان اكيرا مو من طبقتنا ..؟؟
يونا : ايوه ...
آيا : عزمني على زواج اخوه نيزو ... فصّل لي فستان وكشخني .. قال لي اختاري لي بنت تناسبني .. انا بحثت له ... في ذيك الليله اعترف لي بحبه .. واختراني قدام كل الناس ... بعدها نسبني لعائله هو يعرفها ... عشان يحسبوني اهله اني من نفس طبقتهم .. عشنا على هالكذبه .. طلعت لنا ماري ..... ومن بعدها عرفني اكيرا على ولد عمه اندو .. كانت ماري تدري عن كل شيء بيني وبين اكيرا ... بعد التخرج ... انقطع حبل كذبتنا واتضح كل شيء .... وكانت سفرة اكيرا معناها فراقنا .....
يونا فتحت عيونها ..
آيا : افترقت عن اكيرا مجبوره وهو بنفس الشيء .... بعدها اللي واساني واعتنى بي كان ولد عمه اندو .... عاملني معامله كأنه اخوي واكثر .... لكن بعد ما طالت المده .... قلبي معد صرت اتحكم فيه ما صرت اقدر اسيره ... حصل اللي خفت منه ... وحبيت اندو .. وزاد على كذا ان اكيرا كان بيرجع و ما رجع ..قبل سنه قلت لنفسي ابعد عن اندو ... بعدت حاولت اني اكون مثل ما كنت .. لكن حصل اللي ما توقعته .. في حفلة التخرج اللي سويتها لك .. قالت لي ماري انها تحب اندو .. تفاجأت .... لكن فكرت .... قلت ماري مناسبة لاندو .... انتي شفتيه .. يشبه اكيرا كثير صح ؟؟
يونا تهز راسها بالموافقة..
آيا تسترسل: في البداية كنت اعتقد اني حبيته لانه يشبه اكيرا ... لكن بعدها ... انا حبيته على انه اندو .... كرهت نفسي بسبب هالشعور ... كثير اقول لنفسي .. اشتاق لشوفه اندو .. لكن شوقي لشوفه اكيرا اكبر ... اكيرا قال لي اذا اشتقتي لي دوري في السماء لما تكون صافيه في الليل عن اكبر نجم ... لاني راح اكون اشوفه لما اشتاق لك ... لكنـ .... نجوم السماء صرت اشوفها كلها كبر بعض ... يمكن ما تفهمين انا وش غايتي من هالكلام ... لكن حبيت اني اقول كل شيء لك ولا اخبي عنك شيء اكثر .....
يونا ما تدري وش تقول وبادرت بسؤال : طيب اندو ؟  يحبك ؟؟
آيا : ما ادري ... لكـــن اعتقد ان هذا مستحيل .. لا تنسين ان اكيرا يكون ولد عمه ... ما يهم اني الحين اتكلم في هذا الشيء .... لانه انتهى
يونا : انتهى ؟!
آيا : من مده حصل لاندو حادث ... جلس في غيبوبه لمده وقام اليوم .... واعلن نسيانه لي بكل صراحة ....
يونا : كيف ... تقصدين انه ما يبي يقابلك ؟؟
آيا بدت تتعبر ودموعها تنزل بحرارة والم : اندو .... اندو .. نساني ... اندو فقد جزء من ذاكرته ومن ضمن هذا الجزء كان انا .....
يونا فتحت عيونها ...
آيا تمسح دموعها : هو ما نساني انا بس .... نسى ماري بعد .. ما ادري هل انا سعيده بهالشيء ولا حزينه .... انا كنت افكر اني ما اظهر قدامه ابدا .... والحين صار يشوفني بنت غريبه .. بكذا اكون ما احتاج اني ابعد عنه ... اللي لازم اسويه اني ما اخليه يتذكرني .. وبكذا حتى هو يرتاح ... يونا .. انا صحيح حبيت اندو .... لكن حبي لاكيرا ما تغير .. تذكري هذا .. اكيرا هو حبي الاول ومستحيل اني اختار غيره حتى لو حبيته ..
يونا : كل هذا حصل معك يا آيـا ؟ ... كل هذا تحملتيه لحالك ؟؟ ..... ليه توك تعلميني .... ؟؟ ليـــه ما قلتي لي كل شيء عشان اساعدك ؟
آيا : لين متى اعتمد عليك ... لازم اتحمل هالشيء بنفسي .... الحين حسيت اني وصلت حدي .... عشان كذا قلت لك كل اللي حصل في السنوات اللي نساها اندو .....
يونا : اسمعي نصيحتي ... انا ما اقدر انصحك بأي شيء حصل في الماضي ... لكن قبل شوي  قلتي انك ما راح تخلينه يتذكرك .... هذا كيف يحصل .. آيا انا بأتكلم معك بصراحة .. الشخص اذا حب شخص ثاني والطرف الثاني ما حس فيه يبكي ... يبكي من حرته على اللي ما حس بحبه ... انتي اللي بتسوينه نفس هذا الكلام ... راح تبكين كثير وراح تحزنين كثير ... وهو ما درى عنك ... آيــا انتي قلتي انه اعتنى بك وساعدك .. تتوقعين ان كل اللي كان يسويه معك .. ما يبي يتذكره ؟؟ .. الا بالعكس لازم تساعدينه على انه يتذكرك .... لازم يعرف انه غالي عندك ... ومن جهة الحب .. انتي  قلتي ان مشاعرك لاكيرا ما تغيرت ... وقلتي ان اندو ما يدري انك تحبينه ... آيا .. كل شيء حصل .. المتعذب الوحيد فيه هو انتي .. قاومي فكري بعقلك .. وينك يا آيا ؟ ... من قبل كنتي تصرفين كل شيء بحكمة ... آيا لا تخلين مشاعرك وعواطفك تتغلب عليك في كل شيء .... انتبهي لكل خطوة تخطينها ...
آيا عيونها امتلت دموع : يونا ..
يونا ابتسمت: هذا اللي اقدر اقوله لك ..... يمكن ما يعجبك بس لا تنسين هذا تفكير عقلاني ....
في بيت ابو اكيرا " غرفة ماري " :.
ماري تنسدح على السرير ...
ماري بتفكير : لـــيه قالت لي كذا ؟؟ .... معقوله يكون تفكيري من الاصل خطأ .... يمكن تشابه في القصة .. اندو بس صديق لآيا ..
وتنقلب مع الجهة الثانية ....
ماري : المفروض الحين افكر كيف اخلي اندو يتذكرني .. معقوله كل هالمده اللي عشتها معه ينساها كذا ... آآآآآآآآآآآه ما ابـييييييييي ....
وبعد يومين ...
تصحى ماري وتركب سيارتها رايحه للمستشفى لان اليوم بياذنون له بالخروج ...
ماري : ياربي على اني كل يوم ازوره الا انه لازال ما يتذكرني ويعاملني بجفا واسلوبه بارد وعنيد ياربي الله يصبرني عليه بس والله شيء يقهر ما نسى الا انا وآيا بس اما الباقي عرفهم كلهم والله ما الومك يا آيا ماجيتي تزورينه من بعد ما نساك ... اليوم اجازة ... اتمنى كل شيء يكون بخير ...
تروح ماري وتنزل للمستشفى تشوف آيا واقفه عند باب المستشفى ..
ماري : هلا آيا ..
آيا : ليش تأخرتي مو انا كلمتك امس وقلتلك لا تتأخرين..
ماري باعتذار: والله اسفه غصب عني ..الا تعالي ليــــه ما دخلتي  ؟؟
آيا : خفت يكون فيه احد .... عشان كذا ادخلي قبلي وشوفي ...
ماري : طيب ...
تدخل ماري وتتأكد ولا تلقى احد تتصل على آيا وتقولها تعالي .... تروح آيــا وتدخل على اندو .....
آيا : السلام ...
اندو : وعليكم السلام ....
ماري : اليوم بتطلع ......
اندو : علموني اني باطلع العصر ...
ماري : فرحان ؟؟
اندو : انا بس ابي افتك من هالريحة .....
آيا : اندو .. كيفك مع ماري ؟؟
اندو : انتي صديقتها ؟؟
آيا : أيــــه ... وصديقتك بعد
اندو : وليــه تسأليني عن هالشيء ؟؟
آيا : لاني اشوف ان معاملتك معها تغيرت ...
اندو : ليه انا كنت اعرفها من قبل ؟؟
آيا : أيـــــه ... ماري بنتـ...
وتقطع ماري كلامها بكلمه : آيـــــــــا ....
آيا تناظرها باستنكار ..
ماري: بعد اذنك يا اندو ..
اندو يناظرها بلا مبالاة..
مسكت ماري آيا مع معصمها وطلعو برا ....
آيا: ماري وش فيك؟
ماري : آسفة ما قلت لك من قبل شيء ....
آيا : وشو ؟؟
ماري : بعد ما درو اهلي ان اندو ناسيني ... قال لي ابوي اني اظهر له كشخص جديد احسن ... ابوي قال له امس هذي بنتي كانت في امريكا وتوها راجعه ... رد عليه اندو بكلمة [ انت اصلا مالك بنت ] ... قال ابوي هذي بنتي ولازم تعرف انها بنت عمك ... وانه يوم كان في ايطاليا اكتشوفو اني ما مت ورجعت الحين .... عشان كذا انا باكون شخص جديد عليـ...
آيا تقطع كلامها : شلون قلتو كذا ؟؟ انتو كذبتو عليه ...
ماري : لا احنا ما كذبنا انا صدق بنت عمه ...
آيا : راح يجي يوم ويتذكر .... راح تكونين كذابه ... اندو لازم يعرف انك كنتي معه طول هالمده ... مستحيل تمحين ست سنين من عمرك ناسيها  ..... وهي بالنسبة لك اهم سنين حياتك ... هي اللي عشتي معه فيها وحبيــــــــــــــــــتيه .... اندو لازم يعرف انك كنتي دائما معه وجنبه ... حركتك غلط .. ماري الحين لازم تثبتين له انك تحبينه ....
سكتت ماري شوي ثم ....
ماري : آيـــا ... ~
آيا : نعم ..
ماري : اندو راح ينسى كيف كان شعوره تجاه الناس صح ؟؟
آيا : ايوه ..
ماري : اندو ... قال لي من قبل انه يحب وحده ..
آيا : ايوه ..
ماري : هل ممكن انه الحين ما يحبها ؟؟
آيا بحسره : لا .... مو انه ما يحبها ... لكن يكون ناسي وش مشاعره تجاهها .... يمكن يكون ناسيها ...يعني راح يعاملها معامله عادية زي أي شخص .... ماري ... هذي فرصتك ....
ماري : هاه ...
آيا : البنت اللي كان يحبها راح يعامها مثل أي شخص .... جاء دورك ... قلبه ما فيه احد ... اسكنيه ...
ماري باستغراب : اسكنه ؟؟
آيا : حاولي ..
ماري في نفسها : كيف تنصرني عليها ... الشخص اللي كان يحبه اندو هو آيا .... والحين آيا تعطيني مكانها في قلبه ... كيف قدرت تستغني عنه ..
آيا في نفسها : ليتني على الاقل عرفت انا ويني في قلبه ...
ماري باصرار : راح اسكنه ....
آيا ابتسمت لها بسمه حزن : صح كلامك ...
ماري : اندو هو حبي .. وراح اخليه يحبني ..... راح اصبر .. لين اكون في قلبه ...
آيا ابتسمت وتقول في نفسها : ماري حاولي ...
تجي بنت جميله تركض ومعها باقة ورد ..
البنت : لو سمحتو ممكن اسألكم ؟؟
آيا : تفضلي .
البنت : وين غرفة المريض ديجير اندو ...
آيا وماري متفاجئين ...
البنت : انتو تعرفون ؟؟
آيا تأشر على غرفته : هذي هي غرفته ....
البنت : شكرا ...
تدخل على الغرفة ويدخلون وراها آيا وماري ....
البنت : اندووو ...
وتحط الباقة على الطاوله وتضمة ...
البنت : خفت عليـــــــك كثير ..
آيا وماري واقفين في مكانهم من المفاجئة ....