(( الفصل العاشر – الجزء 1 ))

قلبي هو المتعب  ..(( الفصل العاشر – الجزء 1 ))

في مدرسة ماري واندو الخاصة :.
اندو : صباح الخير ....
ماري : صباح النور ....
اندو : زين اليوم جاية مبكرة ؟
ماري : خير ان شاء الله بس عشاني تأخرت 7 مرات قلت لي هالكلام ؟؟
اندو : وتحسبين السبع مرات شوية ؟؟
ماري : ايه .. لانك ما تعرف اني من قبل ما كنت اروح للمدرسة الا آخر الطلاب .... وكان عادي
اندو : اف اجل  يا صبر صديقاتك عليك  اول ...
ماري وهي تطلع الدفتر من الشنطة : ايه عادي كلهم يتأخرون حتى آيا كانت تجي بعدي ...
اندو : اجل صديقاتك كلهم مثلك ؟؟
ماري : ايه ..
اندو : يالله انا بروح لفصلي عندي حصة ....
ماري : اشوفك في الفسحة لا تنسى ...
اندو : كل اليوم تقولين هالكلام ما مليتي .......
ماري : اقول اخلص تراك عطلتني يله روح لفصلك .....
اندو : الشرهى مو عليك الشرهى على المسكين اللي يجي ويسلم عليك ...
في مدرسة آيا وقت الفسحة :.
آيا حاطة يدها على ذقنها متركية على الطاولة : اكيرا وين ماري من زمان عنها ؟؟
أكيرا وهو يحط اكله على الطاولة ويجلس : صادقت لها بنات في المدرسة الخاصة ....
آيا بابتسامة: ما شاء الله حركات ماري....
اكيرا يضحك : هههه صدّقتي .... تراني اكذب ... اصلا ماري ما تبي حتى تتعرف عليهم ... تقول ان اندو كافيها عن كل الصديقات
آيا ايا تاكل : آآه يا حليله .. هو في نفس فصلها ؟؟
أكيرا  : لا .. وحتى فصله في دور غير الدور اللي فيه ماري ....
آيا : ليه ما صارو سوا ....
اكيرا : كذا التوزيع ...
آيا : والله لو كنت مكانها كان رحت امثل قدام المدير .....
اكيرا : وتبلشين واحد بعد على الطريق وتتهمينه انه طقك وباقي المسلسل عليك .....
آيا تناظره بطرف عين : وش قصدك ؟؟
اكيرا : ايه ... نسيتي وش سويتي فيني اول يوم من هالسنة ؟؟
آيا تميل فمها : لا ما نسيت ...
بعدها ابتسمت : تصدق عاد لما اتذكره استانس ...
أكيرا ياكل بدون ما يناظرها : ايه اكيد تستانسين لانك كنتي تلعبين في الناس على كيفك .....
آيا تبي تقهرة : وليه كنت .. ؟ انا الى الان وانا العب ....
أكيرا  رفع راسه منصدم : نعم نعم .. مين تعيس الحظ اللي تلعبين به الحين .....
آيا تناظره بعيونها : قلبك ....
بعدها ضحكت : ههههههههههههههه
أكيرا : حلوه اجل صار قلبي هو المسكين .... بديت ارحم نفسي .. تصدقين ؟؟
آيا تشرب العصير: لا ما اصدق لانك دائما تكذب .... وما لقيت غير قلبك تقول له مسكين .. تكفى المسكين اللي انت تسيطر عليه ...
أكيرا ترك اكله: نعم ؟؟
آيا وهي تناظره بقوة عين : ايه ما كذبت في ولا كلمة ..نسيت شلون كنت تجبرني على كل شيء وكنت لعّاب .. خليتني اروح لحفلة سكنك للبيت الجديد مجبورة وخليتني اروح من بكره للمنتزه مجبورة .... ما تعتقد انك كنت تلعب فيني ؟؟
أكيرا  : مو مثل لعبك ....
آيا تحط يدها على راسها: شوفو وش يقول ........
اكيرا رجع يكمل اكله: انتي لعبك يضر الناس ..... لكن انا ما اضر احد .....
آيا منقهرة: يوه واللي تسويه فيني ما يضرني ؟؟
اكيرا بكل برودة اعصاب : لا ما يضرك ...
آيا طلعت عيونها: خير وش شايف ما عندي احساس .....
جتهم راي ومعها اكلها: خير .. وانتم كل يوم على هالحالة طقاق وهواش تراكم تحرجونا مع الناس والعالم
آيا تناظرها بغرور : نحرجك في أيش ؟؟
راي تجلس على الكرسي : استحي اني اقول هذولا اصدقائي .....
أكيرا بصف آيا: بالله صرنا احنا اللي نحرجك .... اجل وش نسمي الكائن اللطيف اللي معك .... هو اكبر احراج لك
توما : لو سمحت يعني انا ما تكلمت ولا قلت شيء عنكم ... ليش تدّخلني في السالفة ؟؟
أكيرا بابتسامة: لانك انت نقطة ضعف راي ....
واستمر الطقاق بينهم وهم كل يوم على هالحالة .....
في مدرسة ماري الخاصة في الطلعة :.
اندو : بالله ما بعد صادقتي احد في فصلك ؟؟
ماري : لا كلهم ثقيلات دم وحتى الاولاد مغرورين بزياده ...
اندو : و الى  متى ؟؟
ماري : الى الابد ... وشو عاد بعيش معهم بس هالترم بعدين افتك من وجيههم النحسه...
اندو : من متى ما رحتي لاكيرا في بيته ؟؟
ماري : والله لهيت شوي مع الدراسة وصرت اذاكر ولا اقدر اطلع واروح له ... بس هو و آيا يجون عندنا في البيت لكن عشان هالايام ايام مذاكرة وانت عارف السنة الاخيرة في المدارس العامة تصير متعبة .....
اندو : ايه الله يصبرنا وياهم .....
ماري :ايه والله .....
اندو : عسى اكيرا احواله زينه مع آيا ؟؟
ماري : ايه تمام ... لا تخاف عليهم يعرفون لبعض زين .... تراهم دارسين كل الثانوي سوا ..
اندو في نفسه : دارسين كل الثانوي سوا ؟؟
ماري : يالله مع السلامة ... اشوفك بكره ....
اندو : مع السلامة ....
طلع اندو وركب سيارته ....
اندو بتساؤل : وش تقصد انهم دارسين كل الثانوي سوا ؟؟ معقوله يعرفون بعض من زمان ؟؟
ويتذكر :
ماري وهي تطلع الدفتر من الشنطة : ايه عادي كلهم يتأخرون وحتى آيا بعد كانت تجي بعدي ...
.....
اندو : صديقة ماري في المتوسط اسمها آيا ؟؟ غريبة نفس اسم رفيقة اكيرا ... وش هالصدفة ؟
ويمشي بالسيارة ...
اندو يتذكر ...
اقتباس من (( الفصل التاسع – الجزء 2 )) ..
اندو : آيا انتي كنتي تحبين اكيرا قبل ما تكونين رفيقته ؟؟
آيا : ما راح اكذب عليك ولا على نفسي ... انا حبيت اكيرا بعد ما صرت رفيقة له ... لان اكيرا كان دائما معي ودائما يبي يسعدني ودائما يواسيني في ضيقتي حتى من قبل ما نصير ارفقاء ... عشان كذا حبيته ...
......
اندو يحط يده خده ويفكر : هل معنى كلام آيا انها كانت تدرس معه في نفس المدرسة قبل ما يصيرون ارفقاء ؟؟ شلون ما كنت انتبه لكلامها .....
اندو يدعس : انا لازم اتأكد ...
وفي اليوم التالي :.
يغيب اندو عن المدرسة ويروح لمدرسة اكيرا وآيا ..... يوقف قدام المدرسة
اندو : كني اذكر ان ماري قالت لي ان هذي مدرستهم ....
وفي الطلعة يدخل للمدرسة .. يشوف طالب ..
اندو : لو سمحت وين القى فصول طلاب صف ثالث ثانوي ؟؟
الطالب : في الدور الثالث .....
اندو : مشكور ...
ويروح اندو وهو يركض للدور الثالث .... يدخل على اول فصل ويلقى مجموعة بنات ما بعد راحو لبيوتهم مجتمعين ....
اندو : السلام ....
تلتفت عليه طالبة : وعليكم السلام .....
اندو يطلع جواله ويفتح على صورة آيا اللي قد التقطها من قبل ...
تذكير .. اقتباس من (( الفصل التاسع – الجزء 2 ))
اندو ياخذ الصورة : واو صايرة جميلة في هالصورة ....او لانك دائما جميلة ومجملة الصورة ...
ويطلع جواله ويلتقط صورة لصورة آيا اللي معه .. ثم يرجعها لمكانها ..
.......
اندو : تعرفين هذي البنت ؟؟
الطالبة : ايه هذي آيا ... واو بنات تعالو شوفو شلون صايرة آيا حلوه في هالصورة .....
ويجون البنات كلهم ....
اندو : كلكم تعرفونها ؟؟
الطالبة 2 : ايه آيا مره مشهورة .....
اندو : ليه ؟؟
الطالبة 2 : هي معروفة في هالثانوي لانها هي اللي حركتها من اول سنه لها فيها ...
الطالبة 1 : وبعد كانت كذا في المتوسط ... بنت مقلعة مره ......
الطالبة 3 : تبي تعرف هي في أي فصل ؟؟
اندو : لا لا .... بس هي دارسة هنا من أي مرحلة ؟؟
الطالبة 4 : من اولى ثانوي ... وبعد كانت معك " الطالبة 1 " صح ؟؟
الطالبة 1 : ايه انا اعرفها من زمان ..... من دخلنا المتوسط سوا وكنا في فصل واحد ...
اندو : هو كان لها صديقات في المتوسط ؟؟
الطالبة 1 : ايه كان لها صديقتين وحده اسمها كانون لكنها ما جلست معهم الا سنه ونقلت والثانية كانت ماري لكنها ما درست معها الثانوي .....
اندو بتعجب : ماري ؟!
الطالبة : ايه ..
اندو : وش اسم آيا الكامل ؟؟
الطالبة 4 : باكورا آيا .... هذا اسمها الكامل .....
اندو : انتم تعرفون بيتها ؟؟
الطالبة 3 : ايه انا اعرفه ....
اندو : ممكن توديني له ....
الطالبة 3 : لكن بيتها في طريق غير بيتي وانا اروح مشي ....
اندو : انا معي سيارة وراح اوصلك لبيتك بعد ...
الطالبة 3 : اوكي متى ؟
اندو : الحين ...... وتكفون ممكن ما تطلع هالمحادثة لايا او غيرها ... هذا سر بيننا ....
الطالبة 1 : طيب ممكن نعرف انت ليش جاي تدور على آيا .... ترا آيا عندها رفيق ......
الطالبة 2 : ولا بعد اكيرا يعني محد يقدر يقرّب منها.....
اندو يسلك : واحد مرسلني ابحث عن احوالها .... ما افكر مثل ما تقولون ..
الطالبة 3 تشيل شنطتها : يله انا جاهزة ......
اندو : يله .... ومشكورين جميعاً ....
ويروح اندو والطالبة لبيت آيا ......
في بيت آيا :.
جولي : آيا .... آيا .. ~
آيا : نعم ......
جولي : امي تبيك تروحين لأم الجيران لان عندها شيء بتعطيه لامي ....
آيا : ورى ما تروحين انتي ..؟؟
جولي ماسكة سماعة التلفون : انا قاعده اكلم صديقتي ..... مو فاضية .....
آيا : توك جاية من المدرسة امداك تشتاقين لها ؟؟
جولي : لا .. هي اليوم غايبة .. وقاعده اقولها وش صار اليوم في المدرسة .........
آيا : طيب يله انا رايحة ... بس هذي آخر مره ... مره ثانية سكري السماعة وروحي انتي
جولي : طيب ... طيب ....
وتطلع آيا من البيت وفي نفس الوقت يلبق اندو سيارة في مكان بعيد شوي عن البيت ...
اندو يناظر آيا وهي تطلع من البيت : هذا بيتها ؟؟
الطالبة : ايه ..
اندو : هي عندها اهل ؟؟
الطالبة : ايه وبعد عندها اخت اصغر منها بثلاث سنوات ...
اندو : فهمت .... يله مع وين اروح لبيتك ؟؟
ويروح يوصل الطالبة لبيتها .... ثم يروح يوقف في المكان اللي راحو آيا واكيرا له في يوم الكريسماس ...... يرفع راسه ويعظ على شفته السفليه ...
اندو : اندو اصحى ... انت اكيد في حلم .... اصحى لان هذا الحلم ما يعجبني .... هذا حلم .. حلم وقريب راح اصحى منه ....
ويضرب بيدينه على وجهه : قوم قوم من نومك يا اندو ... قوم وانسى اللي شفته وسمعته ...
ويغمض عيونه ويتذكر ......
اقتباس من (( الفصل الثامن – الجزء 1 ))
[أكيرا : أندو هذي رفيقتي اعرفك عليها واسمها آيا .....
أندو : تشرفت ...
آيا : وانا بعد ...]
.......
اقتباس من (( الفصل التاسع – الجزء 2 ))
[اندو : آيا اظن ان ما عندك هموم .... عشان كذا انتي سعيده ...
آيا : هموم ؟؟
اندو : ايه هموم ...
آيا : الا قول ما اظن ان فيه شخص بدون هموم ... من قال ان ما عندي هموم
اندو : وش همومك ؟؟
آيا : احب احتفظ بهمومي داخلي ... بس اللي اقدر اقوله ان همي واحد لكن كبييير .... وانا اعيشة يوم ورا يوم وما يفارقني ولا لحظة ....]
.......
[اندو : آسف اني اقولك هذا الكلام وانتي من طبقة عالية ... لكن انا فيني من طبع اكيرا ما احب بنات الطبقات العالية ... يمكن تقولين انك منهم لكن يمكن تكونين 1 بالمليون منهم ... واكيرا ما شاء الله عليه نظرة ثاقبة وقوية انه عرف يختارك بس بالنظر .. ]
.......
اندو يمسك راسة من الصدمة : شلون شلون ما كنت احس باللي تقوله ؟؟ وشلون قلت لها كل شيء براحة ؟؟ ليتني ما التقيت بها ولا عرفتها يكون اهون ...
ويجلس على الارض وينزل راسه ويتذكر ...
اقتباس من (( الفصل التاسع – الجزء 3 ))
[آيا تخم أكيرا ... واكيرا متفاجئ ...
آيا : ابي اكون معك للابد ....
أكيرا يبتسم ويحط يدينه عليها ...
اكيرا : هذا وعد ...]
........
اندو يجلس على الارض ويتسند على المطل : آيا كانت خايفة على علاقتهم واظن ان هذا كان همها اللي تعيشة كل يوم ..... لكنـ.... آيا ريونجي و آيا باكورا ..... شخص واحد !!.... معنى هذا ان عمي وزوجته ويمكن بعد نيزو او الكل ما يدري عن الحقيقة الا آيا واكيرا وماري وخلو الموضوع سري بينهم ....
ويرن جواله ..... يفتح الجوال
اندو : الوه
ماري : السلام
اندو : وعليكم السلام
ماري : سلمات يا اندو ليش اليوم غايب ؟؟
اندو يصرف : تعبان شوي ...
ماري : تراك اليوم معزوم ...
اندو : وين ؟؟
ماري : عندنا في البيت ...
اندو : وش المناسبة ؟؟
ماري : هي مفاجئة عشان كذا ما اقدر اقولك ... المهم تعال الكل بيصير موجود  ......
اندو : آسفـ..
وتقطع ماري كلامه : ما عندك عذر وعمي وزوجته بيجون ويقول عمي انك اليوم مره فارغ .. لا تكذب ولازم تجي ...
اندو : ماريـ.. لا تجبريني
ماري : الا والمناسبة مهمة لنا كلنا ... اندو ترا الكل بينقد عليك .... عشان كذا تعال
اندو يسكت شوي ثم : اوكي ... لكن متى ؟؟
ماري : الساعة 7 ....
اندو : طيب.. راح اجي ..
ماري : يالله مع السلامة
وتسّكر السماعة .....
اندو : ليه تبيني اقابلها في نفس اليوم ... كان صبرتي علي شوي ...
ويمر الوقت ... ماري تكلم آيا ....
آيا : وااااااو مبرووووك
ماري : الله يبارك فيه ......
آيا مبسوطة: يااااااااي اجل خلاص بتصيرين عمه ؟؟
ماري : شفتي شلون يا آيا ......
آيا : متى كشفت ؟؟
ماري : امس وقالو انها حامل من شهر ونص ...
آيا : ياي واخيرا ماري بيتحقق حلمها وتلّعب طفل .....
ماري : ههه واي ياقلبي اموت على الصغنونين ..........
آيا : خلاص ان شاء الله راح نكون موجودين في الموعد ..
الساعة الان 7 :.
يدخلون آيا واكيرا .....
آيا بابتسامة واسعة : مبرووووووووووووك ... اخيرا بتصيرين ام ؟؟
شيري بفرحة : مشكورة يا آيا ....
أكيرا : مبروك لكم
نيزو بابتسامة: الله يبارك فيك وعقبال مانشوف عيالك .....
اكيرا انحرج : ههه توني مبكر على اني اكون اب ...
الاب : اكيرا ما اتصل عليك اندو ؟؟
اكيرا : لا
ابو اندو باستنكار : غريبه قايل انه بيجي معكم ...
ماري : ما قال لي  ؟؟
آيا : واحنا بعد ما ندري عنه وما قال لنا شيء ..
وبعد ساعة ونصف:.
جاء اندو ..
ماري تتقدم له بتوتر: اندو .... ليه تأخرت كذا والله اقلقتنا عليك  ....؟؟
اندو بضيق : آسف بس جتني شوية اشغال ......
ماري حرام عليك كان علمتنا .. على الاقل  تركت جوالك مفتوح مو مغلق..
اندو متوهق : وش اسوي خلص شحن جوالي وانا ما كنت قريب من عند مكان وحتى بعد ما معي شاحن..
ماري تمسكه مع يده: مره ثانية لا تسفهنا وكلمنا لو من هاتف عمومي..
اندو يبتسم مجاملة: اسف آنسة ماري والله ما اعيدها مرة ثانية..
ماري تبتسم : زين..
اندو تذكر: آه ماقلتيلي  وش المناسبة على الحفلة..
ماري بفرحة وابتسامة شاقة وجهها تغمز له : باصير عمه ....
اندو يجاريها : والله ما شاء الله مبروك يا عمة ماري  ...
ماري : الله يبارك فيك .. يالله ادخل جوا الكل ينتظر جيتك..
ويدخل اندو ويبارك لنيزو وشيري ويجلسون ...
ابو اندو : ليش تأخرت ومقفل جوالك حرام عليك خليتنا نوسوس ان صارلك شيء..
اندو باحراج : واللله آسف بس غصب عني..
الاب متفهم لان وجه ولده يدل انه صدق غصب عنه : طيب يالله روح سلم على عمك والباقي..
اندو في نفسه: الله يساعدني ويصبرني على ما اواجه : طيب ..
وهو متوجه لعمه قابل آيا :
آيا بابتسامة : اندو انت جيت والله الكل قلق عليك وينك و ليش ما ارسلت لنا رساله عشان نمرك ....
اندو في نفسه : اندو خلك طبيعي وابتسم في وجهها ....
اندو بابتسامة متغصبها : آسف بس غصب عني انشغلت وما كنت ابي ازعجكم ......
آيا ما عجبها كلامه : لا والله عادي وش تزعجنا احنا اهل ما بيننا هالحزازيات...
اندو في نفسه : ياليتنا مو اهل ولا عرفناك من اصل ..
اندو  : كل واحد منشغل في حياته الخاصة ...
آيا بابتسامة: هاه محد عجبك الى الان ... ؟؟
اندو يصرف : انا بروح اسلم على عمي وحرمته ما بعد سلمت عليهم  ...
شوي ويقوم اندو ويطلع برا ... وتلحقه آيا ....
آيا منحرجة منزلة راسها: اندو انا آسفه اذا كنت ازعجتك بسؤالي ....
اندو معطيها ظهره: لا ابدا ....
ويلفت عليها .......
اندو بكل ضيق الدنيا باينه على وجهه : آيا ..
آيا من شكله على طول ردت : نعم .......
فجأة نطق : لا ولا شيء ..
آيا تقرب من وجهه : اندو وجهك ما يطمن .... انت مريض ؟؟
اندو يلتفت مع الجهة الثانيه وبحسره : انا قلبي هو التعبان .. قلبي مجروح ....
ويمشي اندو شوي....
اندو : وعشان كذا طلعت برا يمكن اللي في قلبي يلتأم ...
آيا : اندو ؟ وش فيك ؟؟ من اللي جرح قلبك .. وسوا فيك كذا ؟؟
اندو رفع راسه : هذا الشخص اللي سرق قلبي ..... جرحني وما توقعت انه هو اللي يسوي فيني كذا ....
آيا : وهذا اللي مخليك اليوم متأخر..
اندو يهز راسه: ايه ..
آيا حزنت له : مين يا اندو ؟
ويلتفت اندو عليها ....
اندو : هذا الشخص هو ....
آيا تشوفه وهي تتحرى وش بيقول .....
اندو : البنت اللي حبيتها ...
آيا : اندو يعنيـ...
اندو : ايه حبيت وحده لكن هذي الوحده تحب شخص ثاني وانا من البداية كنت اعرف انها تحبه لكن قلبيـ...
آيا تمسكه مع يده وتجلسه : انت اهدأ شوي وارتاح بروح اجيب موية وأجي..
راحت آيا بدون ما تستنى منه رد..
راح اندو للحمامات فسخ ساعته وصار يغسل وجهه..
اندو يناظر وجهه في المراية و هو مهموم : ياربي ليش خليتها هي اللي تسمعلي ياربي ابعدها عني وابعدني عنها..
رجعت آيا له ومعها مويتين .. ما لقته فوقفت تستناه في مكانه..
رجع اندو وجلس : آسف ..
آيا تمد المويه له : خذ اشرب شوي ..
اندو اخذ منها الموية وشرب منه شوي وهو ساكت..
آيا تجلس جنبه: اندو ..
اندو : بدون رد التفت عليها..
آيا بهدوء بدون ما تناظره: حبيبتك وش صدمتك فيه ؟
اندو حزن: توقعت انها البنت الصادقة المميزة الرائعة .... لكن .. لكنـ صارت مخادعة وكنت انا من ضحاياها ..
آيا مندهشه : مخادعة ؟!
اندو عيونه تجمعت فيها الدموع : لكن مو هي المخادعة الشخص اللي تحبه هو اكيد اللي خلاها كذا ... لا لا حبيبها شخص رائع وانصدمت بعد فيه .. لا اكيد الدنيا خلتهم يخدعون .....
آيا : اندو انا ما صرت افهم وش تعني بكلامك ... وضّح لي ؟؟
اندو يوقف يبي يبعد عنها ومايبيها تشوف دموعه عطاها ظهره ...
اندو يمسح دموعه ويعدل صوته : ما اقدر اقول اكثر من اللي قلته .... لكن ودي لو لحظة تلتفت لي وتشوفني وتحس بالنار اللي فيني ... هي وهو بيجي يوم اكيد وينفصلون انا اعرف ان هذا اليوم راح يجي ...... لكنـ.. في نفس الوقتـ..
آيا تقطع كلامه : اندو خلاص لا تقول اكثر ..... لاني ما اقدر اتحمل اللي تقوله .... آسفة اندو ....
اندو : لا لا ما يحتاج تتأسفين ... انا الآسف على ازعاجي لك ..
ويمشي اندو ويمر من عندها وهي منزله راسها واندو مكتئب ....
آيا بدون ما ترفع راسها : اندو لما تنفصل البنت عن الشخص اللي تحبه راح تحتاج لشخص يمد لها يده ويواسيها ويمكن كذا تكسب حبها لانك ظهرت لها في اصعب اوقاتها .....
اندو وقف وسكت وشوي .....
اندو : اتمنى ان كلامك اللي قلتيه الحين ما تنسينه.....
ومشى وخلاها..
آيا تناظره بدهشة من رده فعله للكلمة اللي قالتها .....
آيا في نفسها : اندو ؟ انت من جد غامض ولا ينعرف لك ....
وتنزل راسها وتقول في نفسها : ليتني اعرف من هالبنت واعّلمها مقدار اخلاصك وحبك لها ......
وتمشي آيا وراه ...
اندو يلتفت عليها: آيا انا بطلع بروح ما اقدر اجلس اتمنى توصلين سلامي لعمي واكيرا لاني ما اقدر اشوفهم ..
آيا : طيب الله يكون بعونك.. مع السلامة
وتروح آيا .... وطلع اندو ويركب السيارة ..
اندو يحط راسه على الدركسون : اندو وش هالكلام اللي قلته ؟؟ انت من جد مجنون ... شلون قلت لها هالكلام ؟؟وليش وصيتها توصل سلامك لاهلك انتي بأي عقل كنت تتكلم؟؟
وجوا البيت :.
اكيرا : آيا وين اندو ؟؟
آيا : توه راح .. وقال سلميلي على عمي واكيرا.
اكيرا بصدمة: ليش وش صار له..
آيا : تعبان وراسه يعوره فقال بروح ووصاني اوصل سلامه لك ولعمي..
اكيرا : يوه من متى راح؟؟
آيا: هالدقيقة ....
ويروح اكيرا يركض للباب ....
آيا : وش فيه ؟؟
ماري : اكيرا لقى ساعة اندو في الحمامات فخذها عشان يعطيهاله ....
برا البيت :.
اكيرا يضرب دريشة اندو في السيارة ... يلتفت عليه اندو ويشوفه بدهشة .... يفتح الباب ويحول ..
اندو : اكيرا ؟!
اكيرا : سلامتك آيا تقول انك تعبان وراسك يعورك..و حاط راسك على الدركسون ؟؟ تعبان مره؟؟
اندو في نفسه : آيا ارحميني ..
اندو : لا لا ما فيني شيء بس صداع يمكن لاني امس ما نمت زين ..
اكيرا : موب زين تسوق وانت مرهق او تعبان ..
اندو : لا لا ما فيني الا العافية ...
اكيرا : وين مفتاح السيارة ؟؟
اندو : هذا هو في السيارة .....
اكيرا : روح اركب ... انا بوصلك ...
اندو : والله ما يحتاج اقدر اسوق ..
اكيرا : يا ابن الحلال روح اركب وخلني اوصلك ....
اندو : شلون بترجع ؟؟
اكيرا : بآخذ سيارتك وارجع بها وبكره تعال خذها من بيتي ....
اندو : اقول بدال هالمشوار خلني اروح بنفسي وانت اجلس .........
اكيرا : انا ما شاورتك .... اركب .. اركب بس
ويركبون السيارة ويسوق اكيرا باندو ... اندو مغمض عيونه ومنسدح شوي على المرتبه .....
اكيرا : وانت بهالحال كنت تتوقع انك بتقدر تسوق ....؟؟
اندو يرد عليه وهو بنفس الحالة : ايه .. كنت اقدر ..
اكيرا : والحين ؟؟
اندو : ما اقدر على شيء .....
اكيرا : وش فيك ؟؟
اندو : ما فيني شيء ...
اكيرا : انا اعرفك زين .... وحالتك كذا ما تسّرني ...
اندو : تسلم يا الغالي  ... بس احس ان راسي شوي مصدع
اكيرا : من ايش ؟؟
اندو : اليوم احسني ما ارتحت ....
اكيرا : حصل شيء ؟؟
اندو : ايه حصل شيء فاجئني مره .... وخلاني طول الوقت قلق .....
اكيرا : وش صار ؟؟ يمكن اقدر اساعدك بشيء ...
اندو : ما تقدر .. وتكفى ما فيني حيل اتكلم اكثر من اللي قلته ....
اكيرا بدون رد : ....
اندو : اكيرا بأسألك ؟؟
اكيرا يلتفت عليه: نعم ...
اندو : لو خيروك بين الحبيب و الصديق من بتكون معه ؟؟
اكيرا : ما فهمت قصدك ؟
اندو : لو يوم حبيت شخص وهذا الشخص يحب شخص ثاني والشخص الثاني عزيز وغالي عليك .... وش بتسوي ؟؟
اكيرا : يعني كلهمـ.....
يقطع اندو كلامه : متى اقدر اعبر عن حبي لذاك الشخص ... انا ما ابي ادمر علاقتهم ... لكن قلبي صار يتحكم في مشاعري ... ما اقدر اتحمل اني اشوفها مع واحد ثاني ..... بس المشكلة هو ذاك الشخص اللي تحبه .... لاني انا بعد اغليه ولا اقدر اخرب عليه ..
اكيرا : ما ادري ..... راح اكون محتار كثير ......
اندو : شفت ... حتى انت اللي دايم تلقى حلول ما لقيت لهالمشكلة حل ...
اكيرا : اندو انت ؟
اندو : لا مو انا ..... هذا شخص اعرفه وعزيز علي مره ..... وودي اساعده باللي اقدر ....
اكيرا : انا آسف ... لكن احتاج وقت عشان اقدر اجيب لهالمشكلة حل عادل ....
اندو : ايه .... تقدر تاخذ الوقت اللي يناسبك .... لكن لو لقيت ...
وينزل راسه وبصوت خفيف : راح تنصرنــــي عليك ...
اكيرا: وش تقول..
اندو: ولا شي..
ويوصلون للبيت ...
اندو : تفضل ..
اكيرا : مشكور لكن بروح ارجّع آيا لبيتها ...
اندو في نفسه : لبيتها مع اهلها ..
اكيرا بابتسامة: سلامتك ياولد العم ما تشوف شر ..
اندو ينزل: الشر ما يجيك يالله مع السلامة ..
اكيرا : مع السلامة ....
وفجأه تذكر: فتح الباب ونزل لولد عمه..
اندو مستغرب : وش فيك؟؟
اكيرا يضحك : ههه نسيت الشيء اللي لاحقك عشانه..
اندو مستغرب: وشو؟؟
يمد كيرا له الساعة : خذ نسيتها ..
اندو يضرب راسه : يوووه جد نسيتها مشكور يالحبيب..
اكيرا: الله يشفيك يالله روح ادخل وارتاح .....ولا تنسى تجي بكره وتاخذ السيارة من بيتي ...
اندو بابتسامة صفرا : طيب  ... مع السلامة
اكيرا ابتسم له ورجع لسيارته ..

ومع تواصل الاحداث صار صعب اني احط اقتباسات لانها راح توضح الاحداث الجايه وانا ما ودي احرقها عليكم ....
مع اكمال الحدث نلقاكم في الجزء القادم ......